Enwi, cychwyn, dehongli a chymhwyso

1.—(1) Enw'r Rheoliadau hyn yw Rheoliadau'r Gwasanaeth Iechyd Gwladol (Ffioedd am Gyffuriau a Chyfarpar) (Diwygio) (Cymru) 2001, a deuant i rym ar 1 Gorffennaf 2001.

(2) Yn y Rheoliadau hyn, onid yw'r cyd-destun yn mynnu'n fel arall—

• ystyr “Cynulliad Cenedlaethol” (“National Assembly”) yw Cynulliad Cenedlaethol Cymru;

• ystyr “y prif Reoliadau” (“the principal Regulations”) yw Rheoliadau'r Gwasanaeth Iechyd Gwladol (Ffioedd am Gyffuriau a Chyfarpar) (Cymru) 2001(2);

• ystyr “y Rheoliadau Treuliau Teithio a Pheidio â Chodi Tâl” (“the Travelling Expenses and Remission of Charges Regulations”) yw Rheoliadau Treuliau Teithio a Pheidio â Chodi Tâl 1988(3).

(3) Mae'r Rheoliadau hyn yn gymwys i Gymru yn unig.

Diwygio rheoliad 10 o'r prif Reoliadau

2.—(1) Diwygir rheoliad 10 o'r prif Reoliadau (tystysgrifau rhagdalu) yn unol â'r darpariaethau canlynol.

(2) Ym mharagraff (6) yn lle “pharagraffau (7) ac (8)” rhowch “pharagraffau (13) i (15)”.

(3) Yn lle paragraffau (7) ac (8) rhowch y paragraffau canlynol—

“(7) Os oes swm rhagnodedig wedi'i dalu a bod y person y talwyd ar ei gyfer ar neu ar ôl 1 Gorffennaf 2001—

(a)yn marw; neu

(b)yn dod yn breswylydd mewn ysbyty ac wedyn naill ai—

(i)yn marw; neu

(ii)yn aros yn yr ysbyty

yn ystod y cyfnod perthnasol fel y'i diffinnir gan baragraff (9) gellir gwneud cais am ad-daliad, gan y person hwnnw neu ar ei ran neu gan ei ystâd, yn unol â pharagraffau (13) — (15), mewn perthynas â phob mis cyfan yn dilyn y dyddiad pan fu'r person farw neu pan ddaeth yn breswylydd mewn ysbyty.

(8) Rhaid i'r ad-daliad y cyfeirir ato ym mharagraff (7) gael ei gyfrifo fel a ganlyn—

(a)yn achos tystysgrif ragdalu sy'n ddilys am bedwar mis, un chwarter o'r swm rhagnodedig sydd wedi'i dalu am bob mis cyfan pryd y mae neu yr oedd y dystysgrif ragdalu yn ddilys;

(b)yn achos tystysgrif ragdalu sy'n ddilys am 12 mis, deuddegfed ran o'r swm rhagnodedig sydd wedi'i dalu am bob mis cyfan pryd y mae neu yr oedd y dystysgrif ragdalu yn ddilys;

ac at ddibenion y cyfrifiadau hyn, ystyr “mis cyfan” yw mis sy'n dechrau union fis ar ôl y dyddiad y daeth y dystysgrif ragdalu yn ddilys ac yn diweddu ar y dyddiad yn union o flaen y dyddiad hwnnw yn y mis canlynol.

(9) Ym mharagraff (7), ystyr “y cyfnod perthnasol” yw cyfnod dilysrwydd y dystysgrif ragdalu heb gynnwys y mis y gellir gwneud cais am ad-daliad mewn perthynas ag ef.

(10) Os oes swm rhagnodedig wedi'i dalu mewn perthynas â thystysgrif ragdalu sy'n ddilys am 12 mis a bod y person y gwnaed y taliad ar ei gyfer ar neu ar ôl 1 Gorffennaf 2001 ac yn ystod y cyfnod perthnasol a ddiffinnir ym mharagraff (12)—

(a)yn dod yn berson y mae unrhyw un o ddarpariaethau rheoliad 8(1)(b) i (d) yn gymwys iddo; neu

(b)yn dod yn berson sydd â hawl i beidio â thalu o dan reoliad 3 o'r Rheoliadau Treuliau Teithio a Pheidio â Chodi Tâl 1988,

gall cais am ad-daliad gael ei wneud, gan neu ar ran y person hwnnw yn unol â pharagraffau (13) i (15).

(11) Swm yr ad-daliad y cyfeirir ato ym mharagraff (10) fydd y gwahaniaeth rhwng y swm rhagnodedig a dalwyd a'r swm a gafodd ei ragnodi am dystysgrif ragdalu a oedd yn ddilys am bedwar mis ar y dyddiad y talwyd y swm rhagnodedig.

(12) Ym mharagraff (10) ystyr “y cyfnod perthnasol” yw'r cyfnod o dri mis sy'n dilyn yn union ar ôl y mis y gellir gwneud cais o dan baragraff (6) mewn perthynas ag ef.

(13) Rhaid i geisiadau o dan y rheoliad hwn gael eu gwneud i'r Awdurdod Iechyd a gafodd y swm rhagnodedig a chyda hwy rhaid cynnwys y dystysgrif (os cafodd un ei rhoi) a datganiad i ategu'r cais, a rhaid i'r cais ac unrhyw ad-daliad gael ei wneud mewn unrhyw fodd ac o dan unrhyw amodau y penderfynir arnynt gan y Cynulliad Cenedlaethol.

(14) Yn ddarostyngedig i baragraff (15) rhaid i gais o dan y rheoliad hwn gael ei wneud os bydd y person y talwyd y swm rhagnodedig mewn perthynas ag ef—

(a)yn marw neu'n dod yn breswylydd mewn ysbyty ac wedyn yn marw, o fewn 24 mis o ddyddiad ei farwolaeth; neu

(b)â thystysgrif ragdalu ddilys am bedwar mis ac yn dod yn berson—

(i)y mae unrhyw un o ddarpariaethau rheoliad 8(1)(b) i (d) yn gymwys iddo; neu

(ii)â hawl i beidio â thalu o dan reoliad 3 o'r Rheoliadau Treuliau Teithio a Pheidio â Chodi Tâl 1988

o fewn pedwar mis i'r dyddiad y daw'r dystysgrif ragdalu yn ddilys; neu

(c)â thystysgrif ragdalu ddilys am 12 mis ac yn dod yn berson—

(i)y mae unrhyw un o ddarpariaethau rheoliad 8(1)(b) i (d) yn gymwys iddo; neu

(ii)â hawl i beidio â thalu o dan reoliad 3 o'r Rheoliadau Treuliau Teithio a Pheidio â Chodi Tâl 1988

o fewn saith mis i'r dyddiad y daw'r dystysgrif ragdalu yn ddilys; neu

(ch)yn dod yn breswylydd mewn ysbyty ac yn aros yno hyd nes y bydd y dystysgrif ragdalu yn dirwyn i ben, o fewn tri mis ar ôl iddi ddirwyn i ben.

(15) Os gwneir cais o dan y rheoliad hwn y tu allan i'r terfynau amser a bennir ym mharagraff (14) mewn perthynas â marwolaeth sy'n digwydd ar neu ar ôl 1 Gorffennaf 2001 neu mewn perthynas â pherson sy'n dod yn berson y mae paragraff 14(b) i (ch) yn gymwys iddo ar neu ar ôl 1 Gorffennaf 2001, rhaid i'r Awdurdod Iechyd ei dderbyn os yw'r Cynulliad Cenedlaethol wedi'i fodloni bod achos da dros yr oedi wrth gyflwyno'r cais.”.

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau'r Gwasanaeth Iechyd Gwladol (Ffioedd am Gyffuriau a Chyfarpar) (Cymru) 2001 (“y prif Reoliadau”), sy'n darparu ar gyfer codi a chasglu ffioedd am gyffuriau a chyfarpar sy'n cael eu cyflenwi o dan Ddeddf y Gwasanaeth Iechyd Gwladol 1977. Gwneir darpariaeth ar gyfer ffioedd deintyddol a ffioedd optegol ar wahân.

Mae rheoliad 2 yn diwygio rheoliad 10 o'r prif Reoliadau (sy'n gwneud darpariaeth ar gyfer prynu tystysgrifau rhagdalu am ffioedd am gyffuriau a chyfarpar). Mae'r diwygiadau'n ymestyn y cyfnod pryd y gellir hawlio ad-daliad o'r ffi a dalwyd am dystysgrif ragdalu ar farwolaeth y deiliad neu pan dderbynnir y deiliad i ysbyty yn glaf preswyl i nifer y misoedd cyfan sy'n para heb ddirwyn i ben ar ddyddiad y farwolaeth neu ar ddyddiad y derbyn i'r ysbyty.

Mae hefyd yn ymestyn y cyfnod pryd y gellir hawlio ad-daliad pan yw deiliad tystysgrif ragdalu sy'n ddilys am 12 mis yn cael yr hawl i gael esemptiad o ffioedd am gyffuriau a chyfarpar neu ryddhad rhagddynt

Mae'n pennu'r terfynau amser ar gyfer gwneud cais am ad-daliad ac yn gwneud darpariaeth ar gyfer derbyn cais o'r fath y tu allan i'r terfynau amser penodedig mewn achosion lle mae Cynulliad Cenedlaethol Cymru wedi'i fodloni bod achos da dros yr oedi wrth gyflwyno'r cais.