Enwi, cymhwyso a chychwyn

1.  Enw'r Rheoliadau hyn yw Rheoliadau Llaeth Cyddwys a Llaeth Sych (Cymru) (Diwygio) 2008, maent yn gymwys o ran Cymru a deuant i rym ar 22 Chwefror 2008.

Diwygio Rheoliadau Llaeth Cyddwys a Llaeth Sych (Cymru) 2003

2.  Diwygir Rheoliadau Llaeth Cyddwys a Llaeth Sych (Cymru) 2003(3) yn unol â rheoliadau 3 a 4.

3.  Yn rheoliad 2 (dehongli), hepgorer y geiriau “yn uniongyrchol” o'r diffiniadau o “llaeth wedi'i ddadhydradu'n rhannol” a “llaeth wedi'i ddadhydradu'n llwyr”.

4.  Yn y Nodiadau i Atodlen 1 (cynhyrchion llaeth sydd wedi'u dadhydradu a'u preserfio yn rhannol neu'n llwyr a'u disgrifiadau neilltuedig) —

(a)Yn lle Nodyn 1, rhodder y canlynol—

“1.  Ychwanegiadau a awdurdodir a deunyddiau crai:

(a)Caiff unrhyw gynnyrch dynodedig gynnwys unrhyw sylwedd a ganiateir yn unol â Chyfarwyddeb y Cyngor 89/107/EEC ar gyd-ddynesiad cyfreithiau Aelod-wladwriaethau ynghylch ychwanegion bwyd yr awdurdodir eu defnyddio mewn bwydydd y bwriedir iddynt gael eu bwyta gan bobl(4) a fitaminau a mwynau yn unol â gofynion Rheoliad (EC) Rhif 1925/2006 Senedd Ewrop a'r Cyngor ar ychwanegu fitaminau a mwynau a sylweddau eraill penodol at fwydydd(5).

(b)Dyma'r deunyddiau crai a awdurdodir at ddibenion addasu protein y cyfeirir ato yn Nodyn 4:

(i)Anathreiddiad llaeth, sef y cynnyrch a geir wrth grynodi protein llaeth drwy drahidlo llaeth, llaeth rhannol sgim neu laeth llwyr sgim;

(ii)Athreiddiad llaeth, sef y cynnyrch a geir drwy dynnu proteinau llaeth a braster llaeth allan o laeth, llaeth rhannol sgim neu laeth llwyr sgim drwy ei drahidlo; a

(iii)Lactos, sydd yn ansoddyn naturiol mewn llaeth a geir fel arfer o faidd â'i gynnwys lactos anhydrus nad yw'n llai na 99.0% m/m ar sail sych. Gall fod yn anhydrus neu gynnwys un moleciwl o ddwr o grisialiad neu fod yn gymysgedd o'r ddwy ffurf.”.

(b)Yn Nodyn 3, yn lle'r indent cyntaf rhodder y canlynol —

“3.  Heb ragfarn i Reoliad (EC) Rhif 853/2004 Senedd Ewrop a'r Cyngor sy'n pennu rheolau hylendid penodol ar gyfer bwyd sy'n dod o anifeiliaid(6), llwyddir i breserfio'r cynnyrch dynodedig—”.

(c)Yn lle Nodyn 4, rhodder y canlynol—

“4.  Heb ragfarnu'r gofynion cyfansoddiadol a osodir yn y tabl uchod, caniateir addasu cynnwys y protein mewn llaeth i gynnwys isafswm o 34% yn ôl pwysau (wedi'i fynegi ar fater sych sy'n rhydd o fraster) drwy ychwanegu a/neu dynnu ansoddau llaeth yn y fath fodd fel na newidir y gymhareb o brotein maidd i'r casein yn y llaeth sy'n cael ei addasu.”.

(ch)Fel Nodyn 5 ychwaneger y canlynol —

“5.  Penderfynir y lefelau o fater sych, cynnwys lleithder, braster, swcros, asid lactig a lactadau a gweithgaredd ffosffatas yn y cynnyrch dynodedig yn unol â'r dulliau a osodir yng Nghyfarwyddeb 79/1067.”.

Diwygiadau canlyniadol

5.  Yn Rheoliadau Lliwiau mewn Bwyd 1995(7), i'r graddau y maent yn gymwys o ran Cymru, ym mharagraff 6 o Atodlen 2, ar ôl yr ymadrodd “Directive 2001/114/EC” ychwaneger y geiriau “as amended by Directive 2007/61/EC(8)”.

6.  Yn Rheoliadau Ychwanegion Bwyd Amrywiol 1995(9), i'r graddau y maent yn gymwys o ran Cymru, yng ngholofn 1 o Atodlen 7, ar ôl yr ymadrodd “Partially dehydrated and totally dehydrated milk as defined in Directive 2001/114/EC” ychwaneger y geiriau “as amended by Directive 2007/61/EC(10)”.

Nodyn Esboniadol

(Nid yw'r nodyn hwn yn rhan o'r Rheoliadau)

1.  Mae'r Rheoliadau hyn, sy'n gymwys o ran Cymru, yn diwygio Rheoliadau Llaeth Cyddwys a Llaeth Sych (Cymru) 2003 (O.S. 2003/3053, Cy.291) (“Rheoliadau 2003”). Maent yn gwneud darpariaeth ar gyfer gweithredu Cyfarwyddeb y Cyngor 2007/61/EC sy'n diwygio Cyfarwyddeb 2001/114/EC ynghylch llaeth penodol wedi'i breserfio a'i ddadhydradu yn llwyr neu'n rhannol i'w fwyta neu i'w yfed gan bobl (OJ Rhif L258, 4.10.2007, t.27).

2.  Mae'r Rheoliadau hyn yn diwygio'r diffiniadau o laeth wedi'i ddadhydradu'n rhannol a llaeth wedi'i ddadhydradu'n llwyr yn Rheoliadau 2003 (rheoliad 3).

3.  Mae'r Rheoliadau hyn hefyd yn gwneud diwygiadau penodol i'r Nodiadau i Atodlen 1 o Reoliadau 2003, ac yn benodol maent yn diwygio Nodyn 1 a 3, yn cyflwyno Nodyn 4 newydd ac yn ailrifo'r Nodyn 4 blaenorol yn Nodyn 5 (rheoliad 4).

4.  Mae'r Rheoliadau'n gwneud diwygiad canlyniadol i Reoliadau Lliwiau mewn Bwyd 1995 (O.S. 1995/3124) (rheoliad 5) ac i Reoliadau Ychwanegion Bwyd Amrywiol 1995(O.S. 1995/3187) (rheoliad 6).

5.  Mae asesiad effaith rheoleiddiol llawn o'r effaith y bydd yr offeryn hwn yn ei gael ar gostau busnes a'r sector gwirfoddol ar gael gan yr Asiantaeth Safonau Bwyd, Llawr 11, Southgate House, Wood Street, Caerdydd, CF10 1EW.