Enwi a chymhwyso

1.—(1) Enw'r Gorchymyn hwn yw Gorchymyn Deddf Llywodraeth Leol a Chynnwys y Cyhoedd mewn Iechyd 2007 (Cychwyn Rhif 2) (Cymru) 2009.

(2) Mae'r Gorchymyn hwn yn gymwys o ran Cymru.

Cychwyn

2.  Mae darpariaethau canlynol Deddf Llywodraeth Leol a Chynnwys y Cyhoedd mewn Iechyd 2007, i'r graddau y maent yn ymwneud â Chymru, yn dod i rym ar 1 Hydref 2009—

(a)adran 126 (cyfeirio materion trosedd ac anhrefn at bwyllgorau trosedd ac anhrefn, etc.);

(b)y cofnod yn Rhan 6 o Atodlen 18 (diddymiadau) sy'n ymwneud â Deddf yr Heddlu a Chyfiawnder 2006 (p.48); ac

(c)adran 241(diddymiadau) i'r graddau y maent yn ymwneud â'r cofnod a bennir yn (b) uchod.

Mae'r Gorchymyn hwn yn dwyn i rym adran 126 o Ddeddf Llywodraeth Leol a Chynnwys y Cyhoedd mewn Iechyd 2007 (p.28) (“Deddf 2007”) ar 1 Hydref 2009 o ran Cymru.

Mae adran 126 yn gwneud diwygiadau i adran 19 o Ddeddf yr Heddlu a Chyfiawnder 2006 (“Deddf 2006”), gan gynnwys yn benodol roi is-adrannau 19(3) i (8B) newydd yn lle'r hen rai. Mae'r darpariaethau newydd yn ei gwneud yn ofynnol i bob awdurdod lleol sicrhau bod gan ei bwyllgor trosedd ac anhrefn (fel y cafodd ei greu o dan adran 19 o Ddeddf 2006) y pŵer i lunio adroddiad neu wneud argymhellion ynghylch materion perthnasol i'r awdurdod lleol, ac iddo sicrhau bod gan unrhyw aelod o'r awdurdod lleol nad yw'n aelod o'r pwyllgor y pŵer i gyfeirio materion perthnasol at y pwyllgor. Mae'r darpariaethau newydd hefyd yn nodi gweithdrefnau penodol y mae'n rhaid eu dilyn pan yw person yn cyfeirio mater perthnasol at yr awdurdod lleol.

Mae'r Gorchymyn hefyd yn cychwyn diddymiad cysylltiedig.